حكومة تعاقب شعبها.. طلعت صدگ “مبخوتة”!

0
37

كتب : أياد الامارة

*هاي* الحكومة أم الطلايب و “الإخفاقات” طلعت صدگ “مبخوتة” ويمكن تشور بالناس الفقرة وتهجم بيوتهم هجم! 
شو محد يحچي عليها من الجماعة الچانوا يحچون على الحكومات السابقة بسبب وبدون سبب..
١. المرجعية العليا الله يبارك بيها ، بُحت أصوات وكلائها الأخ الصافي والأخ الكربلائي وبعد ما بيهم على الحچي والله يساعدهم تعبوا من الطبخ لجماعة تشرين الهسة صاروا بالحكومة، وما أدري شصار بمكتب المرجع الأعلى دام ظله حتى بيان ماكو..
٢. القوى السياسية “البعض منها” هاي بكيفها وين مصالحها تحچي، لا يهمها شعب ولا دين ولا وطن، أهم شيء العمولات والعمالات..
وهسة جاية إنتخابات تريد فلوس وصرف وشراء ذمم.. 

هاي الدولة هيچ تريد وهيچ يريدون ومن يخسرون بالإنتخابات تصير لا دولة! 
٣. التشرنچية “الرموز” بالحكومة بعد يا حقوق شعب يا بطيخ وخطية يتانون الموازنة تنقر “نگر”  وينشغلون بترميم وتنظيف القصور، يعني شلون تبقى وصخة؟
٤. الخطباء “المنبرية” المصيحچية وكأن على رؤوسهم الطير وبغير مكان بيهم ما اعرف شنو!
سكتة يا أُم حسن سكتة..
٥. فضائيات الهرج والمرج والحگو مات الرادوه صار والعالم استوت..
بعد چا ياهو يحچي؟
ياهو  يهتم لمصلحة الفقير؟
لا الفقيه ولا السفيه.

الحكومة الهوى وياها تلعب بالوادم لعب، وهاي أحسن فرصة  يتعاقب الشعب بيها..
شعب يروح ينتخب وما يسمع الكلام، يگلة شيخ بشير الباكستاني أنتخب فلان يروح ينتخب غيره!
شعب يروح يقاتل داعش وينتصر عليها، ويصير ذيل وعميل وما يخلي داعش بالنجف وكربلاء تلعب جولة!
شعب صابر يومية ينحچي ويا شكل .. مرة روح صوت للدستور الكتبناه وبعدين يطلع الدستور مو زين، ساعة  روح إنتخب وساعة لا!

إذاً هيچ شعب لازم يتعاقب عقوبة قوية:
١. أول مرة نأخر رواتبه ونشوف يحچي لا؟ 
٢. نلعب بمقدراته نلغي شغلات تفيده وندورله فلافل وباگلة بالدهن ونسمطة هو “الشعب” بالدهن!
٣. بعدين نرفع سعر صرف الدولار ونشعل السوگ ونگول الفقير ما يتأثر “ههههه” وراح يصدگ الشعب هو مو چان ولا يزال يصدگ بكل شيء. 
٤. والإنتخابات نلاعب الشعب المصلخ بيها حتى يتحير بزمانه شيختار وما يختار وتبقى حليمة على عادتها القديمة! 
والحليم.. 
تعرفون منو الحليم؟ 
الجبان، الكذاب، حرامي الليل والنهار،… إلخ 
اللهم العن الحليم تكفيه الإشارة. 

زين وين نروح؟ 
المَن نشتكي؟ 
منو يسمع حچينا ونواحنا وبچينا؟ 
وانت يا شعب يا مسكين شتعتقد راح يرضون بجهلك وجوعك وفقرك ومرضك وبس؟ 
لا والف لا 
انت جاهل وجوعان وعايش فگر ومريض وما قابلين عليك لازم ما تعيش ويبقى الوطن بس إلهم بلا إزدحامات ولا إزعاجات ولا خاف واحد يتعلم شوية لو ياكل لگمة خبز ويلبس ثوب حلو وجسمه صاحي. 
اللهم أرنا قدرتك بالظالمين يارب محد إلنا غيرك ومثل ما خلصتنا من صدام وبعض ربع صدام خلصنا من “الحليم” وجماعته وربعه المتحالف وياهم ضدنا.

البصرة : 15 يناير2021

__________________________

وكالة نخلة : المقال يعبر عن رأي كاتبه وحق الرد مكفول.

اترك رد

يرجى إدخال تعليقك!
يرجى إدخال اسمك هنا