خوش تشرين بالشفلات..شنو تحققت المطالب من بقيتوهم بالشارع؟!

0
51

كتب : أياد الامارة

*ها* تشرين وشيرين وجماعة تشرين وشيرين، تاليها صارت بالشفلات ولا خيم، لا عرگ، لا حفافات، شأخبار الوطن؟
لگيتوه، لا؟
فوج مكافحة الدوام وين صار؟
ودم الطفل المعلگ بساحة “النكبة” برگبة مَن؟
دوائر الدولة المحترگة منو راح يعمرها؟ 
والسنة الدراسية التفرهدت منو يعوضها؟ 
صحيح أنتم أغلبكم ما تعنيلكم المدارس والجامعات شيء، بس الناس چانت تريد تدرس حتى تبني وطن! 

وأنتم جماعوا “ابقوا بالشارع حتى تتحقق المطالب” شنو تحققت المطالب؟ 
توفرت الخدمات لو انكتبت برامج لتوفيرها؟ 
تعينوا العاطلين عن العمل، لو لگولهم فرص للعيشة؟ 
أنتهى الفساد والدنيا بخير وما تتقسم الوزارات والوكالات والمديريات والأقسام والشُعب؟ 
شنو ما جاي يتفرهد الشَعب؟ 
بالحسين والعباس وبكل العتبات المقدسات ولا مطلب تحقق! 
چا ليش ما گلتوا خل تبقى “أهل الشوارع” بالشوارع؟
العتبات في كربلاء المقدسة بيها فلوس وتگدر توفر كلشي وكلاشي فماكو مشكلة “تمويل” حتى لو تگطعه اسرائيل والإمارات العبرية المتحدة والسعودية! 

فد سؤال “ليست له علاقة بالدين، على إعتبار مو شغلكم ” بروح أبوكم شأخبار المستحى؟ 
أكو، لا؟ 
النگطة البالگصة وين ما وين؟ 

ختامها مناشدة للأخوين عبد المهدي الكربلائي وأحمد الصافي، اليوم وأنا أمشي بالسوگ مال البصرة القديمة البگاگيل الفقرة، بياعة السمج، أهل الخضورات، … الخ، يشكون، يگولون سوگ ماكو، وهذا لأن رواتب ماكو، اليوم (١) بتشرين الثاني وراتب تشرين الأول محد مستلمة! 
ماكو بيان، دعوة، أي شيء يدفع بالحكومة تنطي رواتب، لو الشغلة ما تهمكم، اهي صح مو يمكم بس هاي الوادم الفقرة ياهو إلها؟

البصرة : 1 نوفمبر 2020

_________________________

وكالة نخلة : المقال يعبر عن رأي كاتبه وحق الرد مكفول.

اترك رد

يرجى إدخال تعليقك!
يرجى إدخال اسمك هنا